राप्ती सोनारीको विकासको लागि संघर्ष समिति गठन गरिएको छ । सबै राजनीतिक
दलका प्रतिनिधि र जनप्रतिनिधिहरुको संयुक्त रुपमा संघर्ष समिति गठन गरिएको हो ।
आइतबार राप्ती सोनारी गाउँपालिकाको कार्यालयमा बसेको बैठकले नेकपाका राप्ती सोनारी
संयोजक चिम बहादुर घर्तीको संयोजकत्वमा ११ सदस्यीय संघर्ष समिति गठन गरिएको बैठकमा
सहभागि राप्ती सोनारी ४ का समाजसेवी सन्तोष खड्काले जानकारी दिए । उनका अनुसार राप्ती सोनारी ६ का स्थानीय अगुवा
तथा काँग्रेसका युवा नेता लवराज खरेललाई सदस्य सचिव राखिएको छ । सदस्यहरुमा राप्ती
सोनारी ३ का वडा अध्यक्ष गंगाराम थारु, ३ कै नेकपा नेता तुलसीराम थारु, ४ का वडा अध्यक्ष
कान्छा थारु, ५ का वडा अध्यक्ष झगरु थारु, नेकपा नेता जीत बहादुर डाँगी र ६ का वडा
अध्यक्ष जनक बहादुर थारु र नेकपा नेता चन्द्र प्रकाश शर्मा (अंकित) सदस्य रहेका
छन् । उक्त संघर्ष समितिले राप्ती सोनारीको वडा नं ४ देखि बैजापुर नेपालगन्ज
जोड्ने सडकको राप्ती सोनारी ६ फत्तेपुरको नर्सरी सम्मको बाटोको स्तर उन्नतीका
लागि विशेष गरि तीन तहको सरकारमा संघर्ष
गर्ने जनाएको छ । बैठक पछि बनेको संघर्ष
समिति संग कुराकानी गर्दै राप्ती सोनारी गाउँपालिका अध्यक्ष लाहुराम थारुले
विकासमा यो या त्यो नभनिकन सबै मिलेर आजै बाट गर्ने प्रण गर्दै बनेको संघर्ष
समितिको मागलाई उच्च प्राथमिकतामा राख्ने
जनाएका छन् । अध्यक्ष थारुले प्रदेश र केन्द्रिय सरकारले बजेट उपलब्ध गराए, गाउँपालिकाको तर्फबाट
कति कसरी बजेट उपलब्ध गराउनु पर्ने तयार रहेको प्रतिवद्धता जनाए । संघर्ष समितिका
संयोजक चिम बहादुर घर्तिले मुख्य सडकको रुपमा रहेको नेपालगन्ज बैजापुर सडकको स्तर
उन्नतीको लागि प्रदेश र केन्द्रिय सरकार संग डेलिगेशन गएर १० करोड भन्दा माथिको
बजेट ल्याउने लक्ष्य रहेको दावी गरे ।
