जुवाको खालमा राप्तीपारिको दशै

सुगम जिल्लाको दुर्गम क्षेत्र भनेर चनिने राप्तीपारिको दशै यस बर्ष जुवामय भयो । दशैको एक हप्ता राप्तीपारिको ३÷४ गाविसमा लाखौँ रुपैयाँको जुवा भएको हो । लाखौं रुपैयाँको जुवा ठाउँ ठाउँमा चल्दा समेत बैजापुर ÷बिनौना गरि २ गाविस हेर्ने ईलाका प्रहरी कार्यालय धामपुर मुख दर्शक बनेर बस्यो । प्रहरी प्रशासनकै जानकारीमा खुल्लेयाम जुवा खेल्न पाइने भएपछि टाढा टाढा बाट जुवाडेहरु राप्तीपारि पुगेका थिए । दाङ, नेपालगन्ज, कोहलपुरबाट ठुलो संख्यामा जुवाडेहरु राप्तीपारि पुगेका थिए । बैजापुर÷बिनौना र फत्तेपुरका विभिन्न स्थानमा खुल्लेयाम जुवा भइरहेको जानकारी पाएपनि प्रहरीले कुनै वास्ता नगरेको स्थानीय बासिन्दाहरुको भनाई छ । बिनौनाको मेला लाग्ने डाँडा, ९ वडा, चिलहरिया,बैजापुरको नयाँ बस्ती अन्धरपुर, खैरहनी, बेलासपुर लगायतका स्थानमा ठुलो जुवा चलेको हो । यि ठाउँहरुमा स्थानीय भन्दा बाहिरका धेरै जुवाडेहरु खेल्न आएको स्थानीय बासिन्दाहरुको भनाई छ । ईलाका प्रहरी कार्यालयका प्रहरी इन्चार्ज सई देवीलाल घर्तिमगर उक्त चौकीमा बसेको एक दशक लामो भइसकेकोले स्थानीय स्तरमा केहि पनि नगर्ने गरेको स्थानीय बासिन्दाहरुको भनाई छ । यी संगै राप्तीपारिमा चोरीका मोटर साइकल, ट्राफिक नियम विपरित मोटरसाईकलहरु प्रहरीको सामुन्ने गुड्दा समेत प्रहरी नदेखेझै गर्ने गरेको स्थानीय बासिन्दाको आरोप रहेको छ ।